أعمدة الرأي

مشاوير

بس بس ياكديسة وجر جر ياكلبة

بسم الله الرحمن الرحيم

*فليعذرني القارئ الكريم لأنني لن اتحدث عن تجربة الهلال الاخيرة امام هلال الساحل او لحن الوداع وعزف السيمفونية ولا عن تألق الشعلة الذي اشعل وشعلل المباراة بدخوله..

*لن اتحدث عن الظاهرة السلبية لبعض جماهير الهلال التي لم تعد تري شئيا جميلا.. في بعض قدامي اللاعبين بعد عودتهم للمشاركة. مع الهلال فقد ظلت تبحث عن أي خطأ يقع فية اللاعب المحلي لتشن عليه هجوما عنيفا ولاذعا واساءات ( يا اخي كرهتنا ،اصلك مابتتعلم ولا بتستفيد ،وكيف انتا لحدي الان قاعد في الكشف)..

*وتعال شوف لما يغلط واحد من المحترفين… يقعدوا يفتشوا ليهو الأعذار (واغلطو انتو يا الحلوين نجيكم نحنا بالاعذار )

*وانا بعتذر للقارئ الكريم فلليوم الخامس على التوالي نعيش في ظلام دامس لا نرى الا سأم وغبن وغضب وغلاء معيشة و٩ طويلة وحميدتي وناس زعيط ومعيط…

*خمسة أيام ونحنا نعيش على طنين الباعوض والذباب ونقيق الضفادع (والبحر رايق والقعونج مالو متضايق).. هكذا كتب أحدهم على إحدى البصات وما يكتب في الركشات والحافلات والتاكسي التعاوني تمثل واقعنا الحقيقي البنعيشو..

*والعجب غنانا ..غايتو الحكومة دي ورتنا الويل وسهر الليل…

وسمعت مع الباعوض ونقيقع الضفادع كمية من الاغنيات..

(بس بس ياكديسة.. جر جر يا كلبة..)

و(الماعاجبو يعاين لي بنخرتو اويمشي بعنقرتو..)

(دق الباب وجانا وجريت ليهو حفيانة..)

*واحدة تغني (حجبني مادايره المروق وزي الأسد لمن تقيف..)

(ياشيخة ماكلموك يالحدوقكك والناس ابوك .. والود حقي مابخلي..)

*(فك العرش وفارقتا درب الشمس..) .

(لوفتحو القلوب بلقوا جنس قطيعة ولو عرفو اسرارك في لحظة بذيعوها .) .

*وفنان اسمو ود راوة بحري يغني (..ناس الكهربة بقيتونا زي اللعبة ,ياناس الكهربة نهار تنقطع وليل تشتغل ، سخانة وباعوض يقتلنا قتل حرام والله تفرزو ناس شغالة وناس قاطعة.) .

(سيد الفنيلة البيضة مكتوب عليها الريدة) (دقستي ليه ؟

يا بليدة من حبه ما مستفيدة دقستي ليه؟

بعتي القليب الرادك زودتي ليه عنادك.

حظ السواد أصابك أصلك براك عنيدة)

(غراك بي كلامه معسول جميل كلامه؛ غراك بي أوهامه.)

(زود عليك أحلامه خلاك وحيدة يابليدة من حبه ما مستفيدة !!!!!)

*ووحدة تانية تغني (انا مرتك مالي مالها مادي نتيجة إهمالها.

لو ماعجبتها الحالة تقعد تربي عيالها.)

(انا جايك يا خاينة انتي صاحية ولا نائمة .)

(لو انتي مرتو الاولي انا مرتو التانية .)

(انا راجلك سحبتو انا ردتو واستلطفتو .

أداني العاطفية أديته أنا الحنية)

(حب القصار طار ليه حب الطوال شخصية.) .

(هو فاكر نفسه براه حواء والداه براه .

لو عمل أي حركة أنا الاسبير خاتاه.)

* ولله دة غنانا ودة حالنا لان كل الاشياءفينا تغيرت وتلقي الزمن غير ملامحنا ونحنا بقينا مانحنا

*”ودة حالنا كدة وانتو حالكم كيف

*عشان كدة نحن نستحق الضرب على القفا وبالجزمة معقولة كان يحكمنا ازهري وعبود والمحجوب ونميري وخالد حسن عباس وعمر الحاج موسى والصادق المهدي وبابكر عوض الله يجي يحكموا ناس زعيط، ومعيط، وكلام مابعرفو يتكلمو

*كسرة*

طالما أن البلد يحكمها امثال هؤلاء وبعض الذين جعلونا غرباءفيها وجعلونا نغني مع الزمن الجميل من ناس ديلا وااسفاي وفعلا من ناس، ديلا واسفاي لانهم لايعرفون السودان ولاقيمة ولامبادئة ولانضالات ابنائةفالابد ان يكون غنانا هابط وكورتنا واطة زي كورة المريخ وخبراءاستراتيجين يتكلمون ماعارفين جابوهم من وين وكل واحد يشطح وينطح ونتذكر فيلم (ياعزيزي كلنالصوص)عشان نحنا نستاهل اكتر من كدة و كهربتنا تقطع بالايام وبرضو نغني بس بس ياكديسة وجر جر ياكلبة

مقالات ذات صلة

زر الذهاب إلى الأعلى
error: عذرا.. النسخ ممنوع