أعمدة الرأي

صابِنّها/ محمد عبد الماجد / للكبار فقط وبعض المُتلصِّصين!!

يقول إحسان عبد القدوس للجيل الجديد، والأجيال الجديدة تحتاج لمثل هذه الوصايا: (إنّ كل ما أتمناه للجيل هو ألا يبني مستقبله على الاستجداء، وأن تكون له شخصية مستقلة حتى لو سار بهذه الشخصية حافي القدمين، وليذكر الجيل الجديد أننا عانينا كثيراً عندما كنا نحن جيلاً جديداً.
والذين تحمّلوا هذه المعاناة هم الذين أثروا في كل التطورات).
وخلاصة وصية إحسان عبد القدوس في قوله إنّ (المعاناة) هي طريقنا للتطور والتقدُّم، وإنّ الاستقلال أمرٌ مُجدٍ حتى لو سرت من أجله حافي القدمين، لذلك لا تيأسوا ولا تتضجّروا، لأن تلك (المعاناة) التي يعيش فيها الشعب السوداني سوف تؤدي إلى الخلاص، شريطة أن لا نهدر أجر هذه المُعاناة بالغضب وعدم الاحتمال والشكوى.
أن تسير حافياً أفضل من أن تسير مكسور الجبين.
أكتب في ظروف صعبة وأجواء مكفهرة والكهرباء، قاطعة منذ الأمس، وعندما تأتي، لا تفعل غير أن تعشمك ثم تقطع تاني، حالها مثل المهاجم البقع مع كل هجمة في التسلل.. ووقت ما يقع في (التسلل) بقع في (الواطة)!!
لكن سوف نظل نراهن على (العشم) إذا فقدنا (الواقع)، لأنّ الوصول للخلاص لا يتم عن طريق الإحباط، تذكّــر دائماً أنّك في وضع أفضل من غيرك، وأنّ من هو في وضع أسوأ منك يتفوّق عليك بالصبر والحمد.
الكلام دا طبعاً ما عندو علاقة بقرعة مرحلة المجموعات، عشان ناس المريخ يأخدوا راحتهم ويشيلوا “نَفَس عميق”.
يا ولد أفتح ليهم الديوان.. خليهم يدخلوا جوّه!! استريحوا!!
نحن إذا فقدنا نقاشات ومغالطات (هلال مريخ) سوف نفقد الكثير.
الحرب دي الواحد ما بطلع منها إلّا بـ(هلال مريخ).
خروج المريخ من (التمهيدي) في الحرب دي ما بنخلِّيه يمر مُـــرور الكرام.
والله يسهِّل علينا وعليهم.
بالمناسبة دي، الشاعر الراحل عزمي أحمد خليل قدّم لحمد الريح أغنية (عشان عارفني بستناك أبيت ميعادنا توفيه)، عزمي في هذه الأغنية جاب آخره (رجيتك وفي انتظار عينيك كمّلت الصبر كله)، نحن صبُرنا كمل في الكهرباء.
هسع وينها المناسبة؟
وعزمي حدّدها معاها بصورة قاطعة وناشفة زي نشرة تلاتة، (عشان ما تنسى ذكرتك.. وقلت براك بتذكْر).
الحتة دي زي لمن تقعد تلاحق ليك في زول للباب، عشان ما ينسى.
وعوض أحمد خليفة بقول (وبرضي ما قادر أسيبك.. لما بنساك بشتهيك)، جدل اللا نسيان في النسيان.. أبو عركي البخيت في الحتة دي بنزل وبطلع، وإنت بتكون بين بين، زي عارف وما عارف، قادر وما قادر.
عاوز تقول حاجة وما عاوز!! مجذوب أونسة غنى لعزمي أحمد خليل (دا ما سلامك ولا الكلام الكان زمان هسع كلامك).. الزول وقت يتغيّـر، كلامو بتغيّـر، أهلنا وقت يتغيّـر زول بقولوا ليه (مالك الليلة قالب وشيك)، أو (الليلة ما ياكا)، أو (ما براك). وعزمي يقول: (كنا قايلين بي ورانا تبقى زيّنا طاري ديمة)، الريد مرات بغشك بالعشم، عوض جبريل بقول: (والفي قلبو ريدة أحلامو بتغشو).
عوض جبريل أخطر زول في الحكمة (الشعبية)، الحكمة التي تخرج من تجربة ومعاشرة.
حكم عوض جبريل في أغنياته حكم (عرق جبين)، ما جابها من الكتب، جابها من الشارع (وما تهتموا للأيام ظروف بتعدي).. زول بكتب الكلام دا لزوجته بعد ما الأمطار شالت بيته.
البيت دا (طبيعة الدنيا زي الموج تشيل وتودي ما تهتموا للأيام) أفضل من ألف بيت يشيلو السيل.
نحن كسبنا بهذه الأغنية التي يترنّم بها كمال ترباس (زي ما بقول الكتاب) كثيراً، بعد ما شال السيل بيت عوض جبريل.
لو ما السيل ما كنا شفنا أغنية بهذه الروعة والحكمة.
المهم هسع خلُّونا مع عزمي أحمد خليل (جينا ما لقينا في عيونك ذكرى ساكت للمحبة.. شلنا شوقنا رجعنا بيهو وما ندمنا على سلامك)، أكعب شئ ترجع بي شوقك فاضي، زي لمن تكون شايل (جك) الفول وما تلقى فول، ترجع بيه وشك يلعن قفاك.
المُؤسف ليس في أن لا تجد الفول، المؤسف (ذكرى) ساكت ما تلقاها.
كمان (الذكرى) فيها حاجة!!؟ وناس المريخ عشان ما يتحسّسوا الموضوع لغاية الآن ما عنده علاقة بالقرعة.
لكن بعد كدا ما بضمن ليكم حاجة، يمكن أخش على القرعة.
ما بقدر امسك نفسي اكتر من كدا.
وأنا لو خَشّيت على القرعة صعب.
عزمي قدّم للفنان أبو عبيدة حسن (نحن ما رضيناها ليك تغمر الدمعات عينيك)، طبعاً حكاية (تغمر) الدمعات عينيك دي بتخلِّينا نحس أنّ الزول دا عيونو كانت. (حواشة).. أو (مزرعة) ، وعزمي يقول (رغم كل خلاف وجفوة برضو شفقانين عليك)، شوفوا المَحَنّة والأصالة.
عزمي بحوم في حتة تانية، وبقدم كلمات وحالات ما في شاعر التقطها أو وصل ليها.
أغنيات عزمي (حنينة) وفيها كميات رهيبة من (المكسرات)، و(مناديل الورق).
الكلام دا كلو ما يخلِّيني اطلع من موضوع (القُـــرعة)، أصلي مراعي حالة المريخاب، قلت أخش ليهم بي إحسان عبد القدوس وعزمي أحمد خليل.
لكن لغاية الآن ما لاقي لي مدخل.
زمان كان عندنا أستاذ عربي وقت يدخل حصة العربي بتكلّم لينا الحصة كلها باللغة الفرنسية، وقت الجرس يضرب، بقول لينا أجمعوا (الكراسات) ويطلع على كدا.. ما نعرف نكتب شنو في (الكرّاسات)؟ المُهم كنا بنجمع (الكرّاسات) ونتعاقب في حصة العربي القادمة.
بالمُناسبة والموضوع دا عن تجربة، المادة التي لا تحبها كل ما تحتاج ليك لي ورقة بتشيل (جوز) من كرّاسها.
هسع وينها المناسبة؟
أها يا جماعة أحسن بعد كدا أعرج على قرعة المجموعات.
صبرت معاكم كتير يا مريخاب.
قلت الدنيا حرب، وما في داعي للغلط.
والهلال دا جاء من الدوري الإسباني؟
بي حربنا إتأهّلنا.. ومن غير أي (دعم)!!
الهلال دا في الحرب، ما شاء الله عليه بصل المجموعات.
المجموعات عندنا في السلم وفي الحرب واحد.. زي شاي اللبن الصباح.
في شاي لبن بدون لبن؟.. يطرشني دي ما سمعت بيها. في قهوة بدون بُن؟
أمانة الله الهلال في الحرب دي يسجِّل في الأجانب متل (الطابشير).
هسع علاقة (الطابشير) بالموضوع دا شنو؟
ما شاء الله تبارك الله.
السوباط والعليقي شغالين متل (حمد والديبة.. حاجة عجيبة).
مريخابي قال لي إن شاء الله الهلال يقع في مجموعة واحدة مع الأهلي المصري وصن داونز الجنوب أفريقي والترجي التونسي والوداد المغربي.
قلت ليه أول حاجة المجموعة فيها أربعة أندية ما خمسة أندية.
تاني حاجة كل هذه الأندية التي ذكرتها مُصنّفَـة في المستوى الأول ولا يمكن أن يكون اثنان منها في مجموعة واحدة.
الزول وقت يطلع من (التمهيدي) ما بدرك لينا الحاجات دي.
ح نقعد نشرح ليكم كتير.
والله في الحرب دي نحن ما فاضين للشرح.. لكن نعمل شنو؟
نتحمّل بس.
بالمناسبة لمن تفطر (سمك) بتحس بالفول دا تمهيدي تمهيدي!!
دي واضحة دي.
ما أظن واحد منكم في (التعليقات) يقول لي: هسع وينها المُناسبة؟
كلامكم كتير متل (المروحة) الشَغّالَة في خمسة.
هسع علاقة الكلام الكتير بالمروحة الشَغّالَة في خمسة شنو؟!
يوم الجمعة المريخاب ح يقعدوا للقرعة.
ما عارف البقعدهم فيها شنو؟
ح يسمعوا اسم الأهلي المصري.. (مُتعوِّدة).. وح يسمعوا اسم صن داونز..(مُتعوِّدة).. والوداد.. (متعودة).. والهلال.. (مُتعوِّدة دائماً).
في سلم.. في حرب.
مُتعوِّدة دائماً.
يا مزمل عشان تبقى عارف، الشيء دا يعني بالإنجليزي.. قرعة مرحلة المجموعات.
والمجموعات دي مرحلة مُتقدِّمة في البطولة الأفريقية.
نواذيبو الموريتاني عمل إنجازاً تاريخياً بتأهُّــله لمرحلة المجموعات.
لأوّل مرة يتأهّــل فريق من موريتانيا لمرحلة المجموعات.
مرحلة المجموعات دي حاجة كبيرة.
أشرحها ليكم كيف؟
دقيقة أفكِّر!!
قول عندك كديسة، حافظة جدول أربعة وسبعة وتسعة.
لا تسعة ما حافظة.
ولا أربعة ولا سبعة.
إنتو مالكم؟ إنتو معانا في القرعة دي؟
هسع علاقة الكديسة بالقرعة شنو؟
أشرحها ليكم كيف؟
جيب ليك (مروحة) وركِّبها في السقف.
الخطوة التانية شغِّلها في اتنين.
أو في تلاتة.
أو ما تشغِّلها.
إنتو مالكم؟ إنتو معانا في القرعة دي؟
أقعد عاين في السقف.
عاين في المروحة.
المروحة لو جابت صوت أو ما جابت.
فكها.
إنتو مالكم؟ إنتو معانا في القرعة دي؟
هسع علاقة المروحة بالكلام دا شنو؟
بالمناسبة!!
وردي سنة ١٩٥٧ في المسرح القومي قدّم بعد أيه ولو بهمسة.
سنة ١٩٦٤ قدم الطير المهاجر.
سنة ١٩٦٩ قدم في تلفزيون السودان من غير ميعاد.
تفتكروا (يا أعز الناس) قدمها سنة كم؟
هسع وينها المناسبة؟
يوم الجمعة ما في مريخابي يفتح ليه تلفزيون.
وما أشوف لي مريخابي في واتس أو فيس.
ولا بالغلط.
يوم الجمعة ما تفطروا (قراصة).
هسع علاقة القراصة بالخروج من التمهيدي شنو؟
أشرحها ليكم؟!
والله ما أشرحها.. أنا تعبان فوق كم؟
المُشكلة ولا بتقدروا.
ولا في زول ساكت يقول شكراً.
وما قصّرت والله.
هسع لو صبّت مطرة.
يا زول علاقة المطرة بالكلام البتقول فيه دا شنو؟
..…..
متاريس
لا اعرف كيف وضع وقدر الاتحاد الافريقي مستويات الاندية الفنية في مرحلة المجموعات؟
فريق بيراميدز وضعه الاتحاد الافريقي في المستوى الثاني على حساب الهلال الذي وضع في المستوى الثالث وعلى حساب النجم التونسي الذي وضع في المستوى الرابع.
معقولة بس.. اشك في هذا التصنيف.
بيراميدز لاول مرة يشارك في بطولة الاندية الافريقية للابطال وتاريخه كله في الكونفدرالية بدأ عام ٢٠٢٠م ووصل لنهائي البطولة مرة واحد وحل وصيفا.
الفساد الافريقي لكرة القدم.
ان شاء الله القرعة تبتسم للهلال.
قولوا يا رب.
في مجموعة الهلال اتمنى الوداد او الترجي من اندية المستوى الاول ، ومن المستوى الثاني اتمني بيترو اتلتيكو او سيمبا ، ومن المستوي الرابع اتمنى جالاكسي البوتسواني او ميدياما الغاني.
الاهلي المصري لو وقع مع الهلال ما كعبة معانا.
المهم نبعد من بيراميدز المصري والنجم التونسي ، عشان المجموعة ما تكون كلها اندية عربية.
مُعسكر الهلال بين المغرب وقطر.
الهلال مُنتظر القرعة، وعلى ضوء الأندية التي سوف يُواجهها الهلال في المجموعات يتحدّد المعسكر.
شغل علمي.
الهلال في الراحة ١٥ يوماً.
في ناس في الراحة للموسم القادم.
راحة سنة كاملة.
عمار طيفور عرفها.
الجزولي مفروض يشوف مُستقبلهُ.
في الهلال بورندي وكنغولي أكيد والكنغولي الثالث لسه.
في انتظار الإعلان الرسمي.
كنغلها.. كنغلها يا العليقي على رأي الأستاذ الرشيد علي عمر.
عليقنها.
وكل يوم جديد.
العناصر الشابة الوطنية في الهلال أتمنى أن تجد الفرصة ويُتاح لها فرصة المشاركة.
المشكلة ما في منافسات محلية وصعب وهي تفتقد للخبرات تشارك في المنافسات الأفريقية.
عودة الدوري الممتاز مهمة.
يجب تنطيم الدوري الممتاز في بورتسودان وعطبرة ومدني ودنقلا.
كل هذه المدن جاهزة لاستقبال مباريات الدوري الممتاز.
المنتخب لديه استحقاقات مُهمّة.
مباريات مرحلة المجموعات سوف تنطلق في ٢٤ نوفمبر.
معقولة الهلال شهر ونصف تاني ما يلعب مباراة رسمية.
المجموعات غير مرحلة التمهيدي.
الهلال سوف يلعب أمام أندية تلعب في منافساتها المحلية المتعددة، وتلعب في بطولة كأس العالم للأندية مثل الأهلي المصري، وتلعب في بطولة السوبر الأفريقي مثل الأهلي والترجي والوداد وصن داونز وسيمبا.
يعني بعض أندية المجموعات تشارك في ٧ بطولات.. والهلال يلعب فقط في البطولة الأفريقية.
الأهلي المصري سوف يلعب محلياً في الدوري والكأس ودوري الرابطة وبطولة السوبر، ديل ٤ منافسات.
وسوف يلعب قارياً في بطولة كأس العالم في السعودية.. دي واحدة.
وسيلعب الأهلي أفريقياً في بطولة السوبر الأفريقي. وفي بطولة الأندية الأفريقية للأبطال.
٧ بطولات.
هذه المُشاركات يمكن تكون مُرهقة وسلبياتها كبيرة.
لكن اللعب في مرحلة المجموعات مُباشرةً من غير حتى الدوري المحلي أمرٌ عواقبه خطيرة.
لا بُدّ من البحث عن حل لهذه المعضلة.
….
ترس أخير: يوم الجمعة ما تنتظرونا.

مقالات ذات صلة

زر الذهاب إلى الأعلى
error: عذرا.. النسخ ممنوع