*لا ادري فربما ان نظرة الناس للاشياء قد تغيرت او ربما كما حدثني صديقي بأن هناك تغيرا عاما قد طرا علي المجتمع ونادي الهلال جزء لا يتجزا من هذا المجتمع العريض المترامي الاطراف فلذلك والحديث لصديقي الذي غاب عن البلاد لاكثر من عشرة اعوام وعاد موخرا بانه قد وصل لقناعة راسخة ان المعايير انخفضت في الهلال، سالته انت قاصد شنو؟
*فاجابني ضاحكا بان المعايير هنا يقصد بها المواصفات الشخصية للافراد الذين يشغلون المناصب سواء كان ذلك في السياسة او في الرياضة وعلي مستوي الاتحادات الوطنية او الاندية وتحديدا نادي الهلال، وواصل في حديثة هائما وسارحا، زمان وما زمانآ بعيد كانت الشخصيات التي تحظي بدخول مجلس ادارة نادي الهلال شخصيات لهاوزنهاوهيبتها ومكانتها الاجتماعية المرموقة و المميزة، كان عضو مجلس ادارة في نادي الهلال بمرتبة وزير وكان رئيس الهلال هيبة وجمال زي رئيس الوزراء، اللبس دا كيف والعطور الما خمج وقبل دا كلو قوة القرار والفكر الثاقب وهيبة الحضور والفهم الاداري العالي والمتقدم، فمثلا رئيس نادي الهلال الطيب عبد الله طيب الله ثراه لما نادي خليجي قام بتكريمة لم يلتفت الراحل الطيب عبدالله ولم يقل كدي نشوف الأمانة العامة ولاارجع للمكتب التنفيذي طوالي اعلن تبرع نادي الهلال بقطعة ارض سكنية في المنشية لرئيس النادي الخليجي.
*في السابق كانت لوائح دار نادي الهلال بتمنع العضو من دخول النادي وهو يرتدي (السفنجة) او يرتدي جلباب الا بالعمة يعني الزي القومي الكامل.
والان نري ونشاهد ونعايش في شخصيات غريبة عن نادي الهلال العظيم دخلو واتحكرو وبقو الكل في الكل شي برمودا وعراقي والواحد فيهم ما بيفرز صديق منزول من جكسا ولا سمع بمحمد حسين كسلا ولا بعرف قصة النقر جا، ولا قوون المولد،
ولا حتي سمع بمتواليات الهلال، ولا بيفرق بين شوقي وفوزي ولا سمع بحافظ عبيد ولا صلاح ابروف. ولو قلته ليو سمعته بي عصبة بيقول ليك نمشي المستشفي،
جيل لا يهتم لتاريخ ناديه، فكرهم كلو انو الهلال العظيم دا عبارة عن عضوية يزيدو رسوما عشان يقعدو اطول فترة ممكنة، والمضحكني حد البكاء تعين اللجان المساعدة، ياخ معقولة ناس اغلبم ما دخلو نادي الهلال ولا بيعرفو باب النادي من ابواب الاستاد، وتسمع باسماء لجان رنانة وشخصيات كل يوم اسم جديد وهاك يا تلميع،
زمان اللاعب عشان يوقع في الهلال لازم يتعرف هو منو وابوه منو وشغال وين واسرته سيرته شنو؟ علشان دا الهلال كبير البلد،
*قلتا لة ياخ هسي دا زمن الاحتراف واللاعب حسب امكانيتو الفنية، اسرة شنو وابو منو؟
رد ضاحكا والله الاحتراف الفي اوروبا الان، ياها معايرو الكان مطبقة عندنا دي، لانو وضع اللاعب الاسري وحالتو الاجتماعية جزء اساسي من عطاءة للنادي.
عشان كده يا اخوي سياسة صاحبي وصاحبك الماسكين فيها دي ما بتودينا قدام، يعني تلقي لجنة مساعدة ذات طبيعة معينة وتلقي رئيسا لا في العير ولا النفير، وقالو دي المؤسسية.
وسداد فواتير انتخابات وهاك يا تعينات والنتيجة معروفة والجمهور يضحك لانو فصول المسرحية محفوظة ومكررة والمشاهد نفس المشاهد والبطل واحد والمؤلف واحد والمخرج واحد، والمنتج واحد ومعروف.
وحليلنا منها.
المفترض حسب المادة ٦٤ الفقرة ٥ من النظام الأساسي لنادي الهلال :
*(يجب أن يكون رئيس رابطة جماهير الهلال المركزية عضواً في مجلس الإدارة).*
والمجلس الما خمج اختار كركساوي رئيسا للرابطة من خارج المجلس.مع كل مودتنا وتقديرا لآل كركساوي الذين قدموا الكثير للهلال
*كسرة*
*ولايزال الحديث مستمرا عن دخل مباراة الهلال والاشانتي الاخيرة
